]شكرا] - لوحتي 《والإمّ وطن》 في غاليري إكزود - الأشرفية من 20 إلى 25 كانون الثاني 2022

《والإمّ وطن》 - 2017

54 ×90 / Mixed Media مواد مختلفة على كرتون

250$ (قابلة للنقاش)

قمر عمري Amar Omri

قصّة هذه اللوحة

https://amaromri.blogspot.com/2018/07/1-2-3-4-5-6-1.html

لوحاتي الأخرى المعروضة للبيع على الرابط التالي (وتناقش الأسعار، لأنني وضعتها في بداية الأزمة قبل أن يطير الدولار إلى ال20ألف وما فوق)

https://amaromri.blogspot.com/2021/07/mes-peintures-vendre-my-paintings-for.html?m=1

مجموعتنا "سحر وقمر/ حلق من ورق" للبيع أيضا على الرابط التالي، و70% من المبيع بيعود ريعه لدعم جمعية سند للعناية التلطيفية ب لبنان:

https://essaharpatterns.blogspot.com/2021/12/le-reste-des-boucles-vendre.html

ما بعرف شو في أحلى من إنو رفقاتك الحلوين يحضروا المعرض ويفكروا فيك ويصورولك لوحتك بحب وإهتمام. شكراا كتير رتروتاااا فنانتنا الحلوة Rita Æ Rizk.

1- أنا من قبل ما إشترك بالمعرض طلبت إذن إنّو إذا فيّي ما أحضر. بعدين لما شفت العدد الكبير من الأصدقاء الحلوين مشارك تحمّست وقلت اذا جلس الطقس بلكي بعمل مجهود وبنزل. قام جلس الطقس بس ما في مجال للمجهود.

لوهلة منجرّب نقنع حالنا إنّو وضعنا مليح وبعدنا قادرين نعيش حياة طبيعية، بس فعليا نحنا بالقعر. المشوار من صيدون ع بيروت صار بدّو معاش لحاله. ما بعرف لأمتين فينا نضل عم نقنع حالنا بالعكس.

2- أنا صارلي سنتين ما عم إنزل ع بيروت. ما عم أحضر لا معارض ولا أمسيات ولا تواقيع ولا ورشات عمل ولا شي. وهالشي تقريبا مريّحني إلى حد ما (لأن على أد بساطك مد اجريك).

نهار اللي نزلت ودّيت لوحتي هيدي المشاركة بالمعرض، جمّعت شي 5 شغلات أعملن بنفس النهار 🤣 وأهمّن إنّي إتمرن مع الفرقة بعد غياب (حتى على الفرقة ما فيي انزل كل أسبوع، بالسنة مرة) ووصّل المصاري ل سند.

3- كتير بحلم وبتمنّى يوما ما اعمل معرض صامت، أرض مقدّسة، اللي بيفوت عليها بيفوت وحده، بهدوء، بصمت، بتأمّل بياخد وقته بالتعرف على اللوحات (مش ع أصحابن) وقبل ما يفل مضطر ياخد معو ذكرى مقدّسة (ما عندو حل تاني)، حتى تباركلو حياتو 😍 إي نعم هيك أنا بشوف الفن. ولقاء الفنانين مع بعضن ومع اللي بيحب من الناس بيكون ب يوم لحاله بآخر المعرض مش بأوّله. لأن لوحاتنا هنّي نحنا. لما نصير نعطي قيمة للوحة الفنان بغيابه قبل حضوره بيتحسن وضع الفن بلبنان.. وهيدي ريتا عملت من قيمة لوحتي بغيابي شكرااا كبيرة مني ومن لوحتي 💖

لما إرجع لاقي أسلوبي رح حقق حلمي ولوحتي تمثّلني حتى ولو ما حدا لمح صورة وجّي 💃🏼💃🏼💃🏼😍

شكرا للقيّمين على معرض 《المتنفّس》 المستمرّ بغاليري إكزود الأشرفية حتى يوم 25. شكرا غاليري إكزود. شكرا للفنانين المشاركين وللزوار الأعزاء.

واللي مش قادر يوصل معليش ما يحس بالذنب. هالإيام صعبة كتير وكل حدا بيعمل أدما بيقدر.

المهم ديروا بالكن عحالكن وع نفسياتكن

قمر عمري 21.1.2022

االهيئة كل اللي إسمن 《ريتا》 بيشبهوا بعضن 😅 مبارح كتبت واليوم كمان بدّي إكتب وأشكر. خلّيكن معي 👇🏽

2- شكرااا ريتا الخوند غانم Rita Ghanem بنت ضيعتي الفنانة بالفطرة واللي مش متابع صفحتها Un peu de tout 2016 يتابعها لأنها بتكتب كتير حلو وبتشارك خبراتها وتقريبا ملحقة ع كل النشاطات الثقافية والفنية بالبلد وبغير البلد 😍😍💃🏼💃🏼 يعطيكي ألف عافية رتروتااا وشكرااا لزيارتك للمعرض ولتصويرك ل لوحتي. غمرتوني حقيقة بمبادراتكن الحلوة يا أصدقائي 🙏🏻🙏🏻💖💖

3- شكراااا لكل الأصدقاء اللي وقفوا وعلّقوا على منشوري السابق 《لوحتي بتصوير ريتا رزق》. عن جد غمرتوني بلطفكن ودعمكن وتشجيعكن، لدرجة صرت عم شوف لوحتي وعم شوف مسيرتي الزغيرة المليانة طلعات ونزلات بعين جديدة وقلب جديد.

♡ ممنونة ع كلّ كلمة وكل شهادة عطيتوني ياها. جدّدتوا فيّي الثقة إنّي ماشية عالطريق الصحيح، طريق قلبي حتى ولو ما كان بيتآلف كتير مع القواعد العامّة والسائدة.

☆ هيك أنا غايصة بعالمي الخاص، بعبّر وبرسم لما لاقي شي (كلمة، جملة، حدث...) حرّكني من جوّا 😁. وكتير بحتاج إنّي عبّر ب كذا طريقة. يعني كرمال هيك ما فيّي إختار شي واحد من مواهبي وإتفرّغله (حتى ولو بدّي موت هههه من الجوع هههه).

🖐 أنا قمر عمري. العالم اللي جوّاتي واللي براسي عالم جدا معجوق ومتشعّب، خلطة غريبة عجيبة، ما بقدر كون متوازنة إذا ما استخدمتن كلّن بالتعبير عن نفسي بهالدني. لهالسبب بغيب شوي هون ت عبّر هونيك، وبغيب هونيك ت إرجع ل هون، وهكذا دواليك.

💥 ما بستغرب بقا الأشخاص اللي بيفكروني 《زهآنة》، لأنّو مستحيل علين يفهموا عالمي ويفهموا الشي اللي بيدور جوّات دماغي. ما بيعرفوا أديش في 《خطوات》 يومية ما عم لحّق أعملا وأديش لهلّق بعد في 《إشيا مأجلة》.

ما بيفهم عليّي إلا اللي هنّي متلي، وأكيد ما في حدا متلي 🤣. في تشابه بيناتنا أكيد، بس ما حدا متل حدا يا حبيبي، وكل حدا منا فريد من نوعه 💜

عن جد شكرا من قلبي لكلّ مبادراتكن وكل كلمة من كلماتكن.

شكرااا للقيّمين على معرض 《المتنفّس》 المستمر حتى 25الشهر بغاليري إكزود - الأشرفية. شكرا للغاليري وأصحابها الحلوين. شكرا لكل الزوار الحبايب، زيارتكن غالية خاصة بهالزمن الصعب 😁

قمر عمري 22.1.2022

شكرا عبّور (عبير كمان من المشاركات بهالمعرض Abir atallah) على الصور الحلوين، ولأنّك بتحبّي تزوري مع اولاد أختك المعارض والنشاطات الثقافية، ت حتى ينمّوا الفن جوّاتن ويغنونا هلق بردود أفعالن وسمكن يوما ما بأعمالن 😁